Mo le aoga lava ia a Otahuhu Primary o le taula’iga lea o aoaoga i le vaiaso atoa na tea nei, e pei ona saunoa iai le puleaoga i le faatalanoaga ma le televise tasi.
Fai mai le pule, Jenny Bernard na amata le vaiaso i le faatinoina o le ‘ava, sosoo ane ai ma taumafataga o le aoauli sa faatino ai le faiga o le suavai poo le umu.
Saunoa Bernard o le vaaso atoa lea o se avanoa ua matuai faamalosia ai le tāua o le gagana Samoa i fanau. O le gagana lona tolu aupito tautalagia lea i Niu Sila ma o loo faatupulaia pea foi le aofai o tagata Samoa i Niu Sila.
Vaaiga eseese i nisi o fale faigaluega, faalapotopotoga ma aoga a o latou faatāua le vaiaso o le gagana Samoa i Niu Sila
E le gata i le aoga lea a Otahuhu Primary ae tele foi isi aoga pei o kolisi, iuniveste aemaise foi fale faigaluega sa faatāuaina le faamanatuina o le Vaiaso o le Gagana Samoa i le tausaga lenei 2023.
O le Aso Faraile ananafi na tele ina taualuga ai e aoga ma fale faigaluega o loo toatele ai Samoa, e ala ia latou taumafataga o meaai Samoa na fai ai.
O le sini autu sa faatāua i le vaiaso atoa “Mitamita i lau gagana, maua’a lou faasinomaga”.
