E tutusa faiga faavae autū poo key policies o le tala faatatau autū o le tupe a le faigāmalo fou a le Faatuatua i le Atua Samoa ua Tasi ua taoto nei i le maota fono o le atunuu, ma faiga faavae autū sa ta’ialaina ai le tala autū o le tupe a le faigāmalo a le Faatuatua i le Atua Samoa ua tasi sa ta’ita’i ai le tama’ita’i faipule o le itumalo o Lotofaga, le afioga Fiame Naomi Mataafa, lea na teena e le paea’iga 17 a le Palemene ua faatā’ape ma māfua ai ona toe faanatinati le palota tele ua mae’a atu.
Ua faailoa lea tulaga i se pepa o faamatalaga faalaua’itele mai le vaega faaupufai o le Samoa ua Potopoto le Samoa Uniting Party, ma ua faailoa ai e lo latou ta’ita’i le afioga Fiame Naomi Mataafa, ua ia tulimata’i le taimi e soālaupule ai i le Palemene le fuafuaga o le tala faatatau autū o le tupe pe a toe tauaofia le fono usu a Samoa i le Aso Lulu o le vaiaso o muamua nei le aso 22 o Oketopa.
O se vaega o faipule o le faatuatua i le Atua Samoa ua tasi e pei ona silafia na latou lagolago faatasi ma le ta’ita’i ma sui faipule o le Itu Agai sa iai i le paea’iga 17 a le Palemene le teena o le tala autū o le tupe, e pei ona māfua ai ona faaaogā nei le vaega 105 o le faavae e faatino ai se fuafuaga tau tupe faanatinati e faagaioia ai le malo a o tālia le pasia o le tala autū fou o le tupe.
Ua faailoa e le ta’ita’i o le Samoa ua Potopoto o le fuafuaga tau tupe na teena, sa faataatia ai ma ta’iala e saga una’ia malosi ai le tamaoaiga o le atunuu, aemaise sa faailoa ai ma fuafuaga sa faatino ua mafai ai ona faaitiitia aitalafu a le atunuu i fafo, ua pa’ū i le sefulu miliona aitalafu a le kamupani vaalele o le Samoa Airways, ma le mae’a ona totogi o nonogatupe e ono i se faletupe i Samoa ma atunuu i fafo.
O le itu tāua i le silasila mamao e pei ona faailoa e le afioga Fiame Naomi Mataafa i le pepa o faamatalaga, o loo mauaa ma malosi fuafuaga ua mae’a na faataoto mai i le fā tausaga talu ai, mo le manuia o le atina’e o le tamaoaiga o Samoa.
