Talanoaina e le Palemia o Niu Sila, Christopher Luxon faapea le ta’ita’i o Papua Niu Kini, James Marape fuafuaga o loo vaavaai ai nei, e faaluaina le toatele o tagata e omai I galuega faavaitaimi.
Ao iai Luxon i Papua mo se taimi laititi ao malolo ai e faatali le isi ana faigamalaga agai i Iapani, na maua le avanoa e feiloai ai ma le Palemia o Papua.
O mataupu i totonu o le Pasefika na mafai ona talanoaina ai lea e aofia ai faigafaapaaga fou o loo faamoemoe e sainia ae le i oo ia Setema.
O le maliega lenei o loo iai i totonu le faaopoopoga o tagata e aumai i lalo o galuega faavaitaimi i Niu Sila.
Ripotia e oo atu i le 38,000 le toatele o tagata omai i galuega faavaitaimi o loo talanoaina.
Ta’ua e le alii palemia o Niu Sila, o loo iai le naunautaiga o Papua ia faaopoopo ana oloa faatau mai i Niu Sila ma o loo galulue faatasi ai nei.
Na tali leleia e Papua le iai o Luxon ananafi, ma o se avanoa foi ua faafetaia ai e Papua le palemia o Niu Sila ma lona malo ona o le agalelei atu i le taimi na pagātia ai Papua i eleele solo i le faaiuga o le masina faatoa uma atu lea na maliliu ai le faitau afe o tagata.
Puna o Faamatalaga: https://www.rnz.co.nz/news/political/519673/prime-minister-christopher-luxon-talks-to-media-from-papua-new-guinea
