Na agiga i lipoti i le One News i le aso ananafi le taumafai ai o nisi o Iunivesite i Niu Sila e totogipau malaga a vaalele mo le aumaia o tamaiti aoga faavaomalo i Niu Sila nei, o loo matuai feagai ma luitau ma faigata le maua o se avanoa e malaga mai ai i le atunuu ae lei amataina kuata faaleaoaoga.
O le tausaga lenei faatoa toe vaaia ai le foi mai o tamaiti aoga faavaomalo mo le tausaga atoa i aoaoga peitai e iai lava pa pupuni nei ma luitau ua faigata ai le faatinoina o lea tulaga.
Fai mai le faauluuluga o le Universities NZ, Chris Whelan o loo silasila nei i auala e foia ai faafitauli o feagai ma tamaiti aoga faavaomalo.
O le isi faaletonu o loo aliae foi o le faatalitali pea lea i talosaga o visa sa faia i le Immigration.
Ta’ua i le lipoti o le toatele o tamaiti aoga faavaomalo o loo maualuga pea le naunau e malaga mai i Niu Sila, e le gata i le lelei o aoaoga ae o le aumau ai foi.
