Ua upuia le malo ina ua alia’e le mataupu e faapea e latou te lei faailoaina i faipule o le Itu agai o loo latou feutagai nei i le mataupu e faasaoloto ai ni tagata Niu Sila se toalua sa poloka i Iran.
O le mataupu lea sa lipotia foi muamua i talafou e aofia ai Topher Richwhite ma lona toalua o Bridget na malaga i Iran o se vaega o le Expedition Earth World Tour ma o loo ta’ua i le lipoti lea e foliga sa fuafua faamatalaga na faia ona o popolega i le saogalemu o i laua ia ma e faatoa saoloto foi le saunoa a le Palemia ina ua mautinoa ua saogalemu i laua ia.
Fai mai le National e ui latou te lagolagoina foi le tulaga na iai le malo i le mataupu lea ae sa tatau lava ona faailoa manino lea tulaga ia i latou ona e tatau ona tau fai manino uma le malo ma le Itu agai i tulaga faapea.
O le tali a se tasi o sui o le Leipa o Michael Wood i le mataupu lea i luga o le AM na ia ta’ua ai, o le faamuamua a le malo na ave i soifua o i laua o loo aafia i lea mataupu.
