Ua upuia e le taitai o le Leipa Chris Hipkins le fuafuaga a le faigamalo ua faia e faatatau i fela’uaiga.
Na saunoa Hipkins i lana faatalanoaga faaiu i le Breakfast mo lenei tausaga e faatatau i le folasaga a le minisita o fela’uaiga Simeon Brown sa faia i le aso ananafi.
Fai mai Brown o loo mananao le faigamalo a le soofaatasi e fia vaai i le faatupulaia o le tamaoaiga o le atunuu ma ia mafai e tagata Niu Sila ona oo atu i nofoaga o loo fia malaga iai i se tulaga vave ma saogalemu.
Peitai fai mai Hipkins o le faiga faavae ua taatia mai nei e faatatau i le saoasaoa faatapulaa o taavale i le alatele, ana faaitiitia, e lē taumate le tele o soifua e faasaoina mai ai.
O suiga ua faalauiloa e le malo i le vaiaso nei e aofia ai le aveesea o tulaga e faamalosia i luga o alatetele e mafai ai e le pulega o le alatele ona faia ni fuafuaga e faatonutonu ai le saoasaoa o taavale.
Fai mai Brown i lana lauga i lalo o le faigamalo talu ai a le Leipa sa finau ai sui o le matagaluega o fela’uaiga ina ia faaitiitia le saosaoa faatapulaa i luga o auala aemaise highways ma auala taloto.
Fai mai Hipkins o le siitia o le saosaoa faatagaina i luga o alatetele e ono aafia ai ma ono maliliu ai tagata i le auala aemaise afai e mananao e vave feoa’iga i le auala ona inivesi lea ina ia faamautinoa o loo saogalemu auala.
