O se su’esu’ega talu ai nei i le tulaga o taoto ai mana’oga o o tatou tagata ua fia faaaogā taavale e ola i le eletise, o le 60 pasene o i latou ua fia maua ia taavale o le itupa o alii.
Peita’i o lea ua amata a’oa’oina le itupa o tama’ita’i i itu e taua ai foi le faaaogā o taavale e ola i le eletise ona o puipuiga o le si’osi’omaga mai suiga o le tau ona o taavale e ola i le suauu ma le penisini.
E 200 tama’ita’i o le atunuu o loo auai nei i se a’oa’oga o loo faatautaia e le Pulega o feoa’iga i le laueleele le Land Transport Authority poo le L.T.A. i le faamoemoe e maua o latou laisene ave taavale, ae o se a’oa’oga foi ua a’oa’oina ai ma ia tama’ita’i i le faaaogāina o le taavale e ola i le eletise ma itu e saogalemu ai le faaaogāina mo le puipuia o le tatou si’osi’omaga.
O se taumafaiga o loo lagolago iai le malo o Iapani o loo aumai ai taavale e ola i le eletise faapea le UNDP i se taumafaiga e siitia le malamalama ma le silafia o o tatou tagata aemaise tama’ita’i i le faaaogāina o malosi faafouina e puipuiamalu ai lo tatou si’osi’omaga faalenatura ma fai sao ai foi i polokalame e tetee atu ai suiga o le tau.
O Samoa e itiiti sona sao i kasa kaponi o loo faaleagaina ai le lalolagi peita’i o loo taulamua i taumafaiga uma e faasaoina ai lo tatou lalolagi mai suiga tetele o le tau.
