O loo iai se lipoti ua faasalauina i le Radio NZ Pacific ua ta’ua ai le iai o popolega o tagata e lagolago ia West Papua, i le ono faia o se osofa’iga faamiliteli a Indonesia i le itumalo o Nduga ona o le faasa’olotina mai o le pailate Niu Sila o Phillip Mehrtens i le vaiaso talu ai.
Fai mai le lipoti o le faamatalaga mai le malo o Indonesia e lē faavaea ia faamatalaga peitai o loo talosaga le sui peresetene o le United Liberation Movement for West Papua, Octovianus Mote i le malo o Niu Sila ina ia mata’itū atu pea Indonesia ina ne’i faia sa latou osofa’iga i le itumalo e pei ona ta’ua.
Fai mai Mote i le lipoti ona o lea ua lē o toe taofia faapagota le alii pailate, ua iai nei le itumalo ma i latou o loo nonofo ai i se tulaga ma’ale’ale, aemaise o loo faamāina Indonesia i le mataupu lea i le alii pailate, ona sa taumafai e faaāta mai i le lalolagi o le TPNPB le latou faalapotopotoga lea, o se faalapotopotoga solitulafono peitai o loo silafia e le alii pailate sa lelei le tausiga o ia i le taimi atoa sa taofia ai.
O le faamatalaga mai le Matagaluega o le Va i Fafo a Niu Sila ua ta’ua ai o loo faaauau pea ona lesitala popolega o Niu Sila i le pulega a Indonesia i tulaga o mataupu tau aiātatau i Papua.
Na faailoa foi e le faigamalo a Niu Sila e faatāua foi le onosa’i o le vaega o le Militeli a Indonesia i le mataupu lea faapea leoleo sa faamuamua ai i a latou feutana’iga le faatumauina o le filemu sa mana’omia mo le faasa’olotoina mai o le alii pailate Niu Sila.
Puna o Faamatalaga: https://www.rnz.co.nz/international/pacific-news/529095/nz-govt-urged-to-pay-attention-for-retaliatory-attacks-by-indonesia-after-phillip-mehrtens-release
