E iai komiti o le palota tele ia Oketopa o lea ua fautuaina tagata o loo lagolagoina i latou e o e apalai i avanoa faigaluega mo le palota.
E tusa ma le 22,000 tagata faigaluega o loo moomia e le ofisa o faigapalota mo le palota o lenei tausaga, ma i saunoaga a le Pule Sili o le ofisa o faigapalota ananafi i Ueligitone na ia ta’ua ai o lea ua ia silafiaina e iai nisi o komiti ua faatonuina o latou tagata e o e galulue mo le faigāpalota.
O le faaiuga o le masina o Iulai lea na faasalalau ai e le Voices for Freedom i luga o le social media ma unaia ona sui e faatalosaga mo avanoa faigaluega nei o le palota, peitai na saunoa le Pule Sili e lē na o le Voices for Freedom o loo taulai iai o lea lava e vaavaai i tagata taitoatasi o loo faatalosaga atu e fia galulue mo le palota.
E ui la i nei taumafaiga uma, ae fai mai le Pule Sili o le ofisa o faigapalota, e mafanafana lava ia, o loo lelei ma mausali le faatautaiga o galuega a le ofisa e ala lea i le matuai iloilo o tagata taitoatasi o loo faatalosaga atu e fia galulue mo le faigāpalota.
