O le atinae o le faafofoaina o i’a ma figota o le sami o se tasi lea o taumafaiga ua silasila iai le Matagaluega o Faatoaga ma Faigafaiva e avea ma lagolago malosi o le atinae lenei i le atunuu ona o tulaga pāgātia ua aafia ai faigafaiva i le Pasefika e mafua i le soona faogtaina o i’a ma figota aemaise auala faaonaponei ua faaaoga i faigafaiva i ogasami loloto.
O le fonotaga o sui o malo o le Pasefika mai le atinae o faigafaiva ma le malo o Saina ua fofola atu ai e le Minisita o lea Matagaluega le susuga Laauli Leautea Polataivao Schmidt nisi o taumafiaga ua silasila iai le malo e avea ma taiala mo ana fuafuaga i le toe faaleleia o lea atinae tau.
I le fontoaga lenei i lalo o le polokalame fesoasoani a le malo o Saina ua faailoa ai e Laauli o le galulue faatasi o Samoa ma lea atunuu ma ana paaga i le Pasefika o le a mafai ona ausia ai nisi o laasaga lelei e pei o le faavaeina o se nofoaga tutotonu mo le faafofoaina o i’a ma figota e faatino ai suesuega ma a’oa’o ai le au faifaiva.
O le finagalo foi o le Minsita e ao ona maua i le polokalame fesoasoani a Saina ni tagata popoto ua aoaoina i lea tulaga ina ia mafai ona saga a’oa’o ai le au faifaiva i atunuu taitasi faapea tagata faigaluega o loo tautuaina le atinae taua. Ua faalia ai e Laauli i le fonotaga lenei na faia i luga o upega tafailagi le avea o Samoa ma nofoaga e tapuvaetasi iai galuega ma polokalame uma i faigafaiva i totonu o le Pasefika. Faaalia foi e le Minisita o le itu i tulaga faapisinisi e ono mafai ona fausia i Samoa se nofoaga e tapena ai aano o i’a mo maketi faavaomalo.
O le tausaga e 2019 na sainia ai e vaega o tiute ma le leoleoina o tuaoi i tau ogasami o Saina ma le Matagaluega o Faatoaga ma Faigafaiva a Samoa se maliega e ave ai le faamuamua i le puipuia malu o tulaga i le faa’asuina o i’a ma isi tapenaga mo le auina atu o lea tamaoaiga i totonu o Saina. Ua manatu le minisita o se isi lea faitotoa lelei e tapena ai le au faifaiva a Samoa e faatau atu a latou seleselega mai le gataifale i maketi i lea atunuu o le Atu Asia.
