O le tuana’i o le iva masina sa faatino ai le galuega o le fausia o se falea’oga fou mo le a’oga tulagalua a le afioaga o Samatau, o lea ua faaulufale ma umusa le galuega ma ua ulufale foi iai fanau a le nuu mo le faaaogāina, a o tau amata le kuata mulimuli faalea’oa’oga o lenei tausaga.
O se galuega na faaalia e se sui o le komiti o lea a’oga tulagalua, na amata i lafoga a matai o le nuu ma fanau a le a’oga tulagalua sa amata lafo i le tausaga e 2021.
O le faamoemoe o ia lafoga e faaaogā i le falea’oga tuai, auā sa le’i iai se fuafuaga e fausia se falea’oga fou.
Peitai na alu alu lea fuafuaga ua iai se finagalo e faatino loa le fausia o se falea’oga fou, e pei ona tali le polokalame fesoasoani a le malo o Iapani i se foa’i tupe e 399 afe tala.
Faaopoopo iai ma lafoga a le nuu ma matāfale o le a’oga tulagalua ma faatino ai loa le galuega i le tau e silia i le 800 afe tala.
O le sui o le malo o Iapani e faamautū i Samoa le alii amepasa o Senta Keisuke na fai ma sui o lona malo e tuuina atu le galuega i le pule ma le komiti o le a’oga tulagalua a Samatau.
O le Minisita o Aoga ma Aganuu na fai ma sui o le malo e faafetaia le agalelei o lea malo, aemaise o le lagolago a le nuu o Samatau i le fausia o le galuega.
O le umusaina o le galuega sa auai ma le afioga i le Ao Mamalu o le Malo afioga i le Tamaaiga, Tuimalealiifano Vaaleto’a Sualauvi II.
