O le nofoaga o loo iai le falema’i tuai i Motootua, i le vaega sa iai le falema’i o tamaiti ua mae’a ona toe fausia ma faafou ma ua iai le auaunaga o le fale su’etoto.
O se galuega e pei ona faailoa e le Minisita o le matagaluega i le tatalaina o le galuega, e 800 afe lona tau sa fausia e le vaega o kamuta a le matagaluega o le soifua mālōlōina.
E 14 potu ua iai i le nofoaga ma o ia potu uma ua vaevae iai auaunaga esese o le fale su’etoto.
O tua ane o le nofoaga ua fausia ai se fale fou o le a avea ma nofoaga o su’esu’ega o faama’i lea o le a faatino ai le tuiina o toto o gasegase faapea le mamalu o le atunuu e ofoina o latou toto mo se gasegase.
Ua ave ai le tuualalo a le Minisita o le Soifua Mālōlōina le Afioga Valasi Luapitofanua Toogamaga Tafito Selesele i le aufaigaluega ina ia tautuana e aputiputi lelei le vaaia ma le faaaogāina o ia meatotino e lē gata o fale a o masini.
O nisi ia o galuega ua umusa a le matagaluega ua pine ai galuega o le a mae’a o lenei tausaga, e pei foi ona sa umusa ma tatala nisi o galuega i le falema’i o Malietoa Tanumafili II ma le falema’i faaitumalo i Foailalo i Savaii i le faai’uga o le vaiaso na mavae.
Ua faaopoopo i le umusaga o le fale su’etoto ma le fale e su’esu’e ai faama’i, o le foa’i o taavale e 3 o le ituaiga o le Van mo le auaunaga a le soifua mālōlōina.
O le faalapotopotoga o le UNICEF ua auala mai ai lea agalelei mo ia taavale o le a faaaogā i le polokalame o tuiga o loo faasavali e le aufaigaluega o tausi soifua.
O le a tofu falema’i e pei o Tupua Tamasese Meaole, le falema’i faaitumalo i Leulumoega i Upolu ma taavale ma le isi taavale van o le a faaaogā e le falema’i o Malietoa Tanumafili II i Savaii.
O le auaunaga lava a lea matagaluega e pei ona faailoa i auala o fesoota’iga a le malo, ua faailoa ai le tatala o galuega sa toe faaleleia ai le falema’i faaitumalo i Lalomanu i le atu Aleipata.
O se galuega ua fausia ai ma le fale e faamautū ai le foma’i e galue ai i lea maota gasegase i lo tatou motu o Upolu.
E $489,877 tālā le tau o lea galuega o nisi o fuafuaga mo le atina’e manuia o le atunuu.
O le toe faaleleia foi o le falema’i faaitumalo i Poutasi ua mae’a ma ua umusa lea e tusa le tau na faia ai lea galuega ma le $484,789 tālā.
O lea tau ua aofia ai ma le fausia o le maota ua mae’a, e faamautū pe nofo ai le foma’i e galue i Poutasi.
