Ua silia ma le lua tausaga talu ona sau lipoti i le lē lelei o ta’iala o loo limata’ita’iina ai tagata galulue faavaitaimi, peitai o se faanoanoaga le leai o se mea o faia iai.

E tusa ma le 13,000 tagata Pasefika o loo galulue faavaitaimi i totonu o Niu Sila, to’atele mai Tonga, Samoa ma Vanuatu.

O galuega nei e lē o iai se tulafono e faatulafonoina ai le tatau ona iai o se aso se tasi o le vaiaso e mālōlō ai mai galuega, ma o se tasi lea o mataupu mai le tele o mataupu na tuuina atu i le minisita o femalagaa’iga i le tausaga talu ai.

E oo lava foi i tulaga tau fale, e lē o faamalieina ai tulafono o loo aiaia ai le saogalemu ma le malupuipuia o fale e nonofo ai tagata i Niu Sila, ma i nisi o molimau, ua 10 masina o faaofiofi tagata e to’afā i totonu o le potu e tasi.

O itu nei e lē o iai se tulafono e fai ma sulufaga o tagata galulue faavaitaimi, ma fai mai le faatonu o le Pacific Legal, e lē fetaui.

Na ta’ua e Nia Bartley o le Council of Trade Unions Komiti Pasifika, ailoga e talia e le to’atele o tagata Kiwi faiga nei.

O le umi o faataamilo talosaga ma suiga mo le manuia lautele o tagata Pasefika o loo galulue faavaitaimi i Niu Sila nei, ua sau ai ma le talosaga aga’i i le malo ia faavavevave sana gaioiga.

Puna o Faamatalaga: Concern some RSE workers being taken advantage of, despite damning review