Ona o le to’aitiiti o inisinia e su’esu’eina fale na faaleagaina i Nelson ua sau ai ma le tala e ono umi se taimi e faatali ai.
O lea ua latalata i le 2 vaiaso talu ona faaleagaina le tele o fale i Nelson ona o le tele o palapala solo, e ese ai le 178 fale e lē o toe mafai ona nofoia.
Peitai o le utiuti o inisinia ua ta’ua o geotechnical o le a faatuai ai ona maua se tonu o fale o loo faatali asiasiga.
Ta’ua e se tasi o inisinia i Nelson, Sally Hargraves, e lē o se mea fou.
E ese mai i le taligā o tagata o loo fia iloa se isi tala i o latou fale, ae o loo faatuai ai foi ma le faatalosagaina o inisiua ma o le 2 i le 6 masina lea ua ta’u.
Ua faaalia ai e nisi ua oese ma fale ona o le tulaga lē saogalemu ua iai, o loo iai le popolega i le tuai ona o le tele o fale o loo faamautu lē tumau ai nei, e uma i le masina o Novema.
