Ua galoma ma mou atu le pisa o manatu o nisi o le au faisaofaga sa aliali i luga o fesoota’iga televavave le social media, ina ua faailoa e le Minisita o Tupe o loo iai ma le vaaia o le Faalapotopotoga o le Faaputuga Tupe o le Lumanai Manuia o Tagata a Samoa le NPF, le faamaonia e le Komiti Faafoe o lea faalapotopotoga a le malo o le 4 pasene o le faamanuiaga poo le dividend mo ana au faisaofaga uma.
O lea 4 pasene o le a totogi atu ai e le NPF le aofa’iga e $43 miliona tala o se meaalofa, ma ua faaigoaina o le faamanuiaga mo le toe foi o fanau i a’oga, le back to school dividend payout.
Le Minisita o Tupe e aofia ai le faalapotopotoga o le faaputuga tupe o le lumanai manuia o tagata le NPF, afioga Lautimuia Afoa Uelese Vaai.
O le tausaga na te’a nei e 2 tesimale 4 pasene na totogi atu i le au faisaofaga mai lea lava faamanuiaga, ae o le tausaga nei e pei ona faailoa e le Minisita ua siitia i le 4 pasene.
Faaalia e le tamaitai Ofisa Sili o le pulega o lea faalapotopotoga a le malo, e le afioga Lemalu Selesitina Reti i tusitala, e totogi uma le 4 pasene o le faamanuiaga.
O lona uiga e leai se mea e alu i le saofaga o loo teu faafaigaluega e pei ona masani ai, lea e avanoa ona toe nonō pe aitalafu ai le tagata faisaofaga.
O lea tufatufaga e pule ai le tagata faisaofaga pe tala i tua pe teu ai pea i lana saofaga.
O le Aso Gafua a sau e amata faagaioi ai le totogiina atu o le 4 pasene o le dividend lea o le a faaalu i faatauga o meaaoga e pei o togiga ma isi tapenaga e pei o pili o fanau.
