E 10 afe tālā ma le ie tele le faasalaga o le taulealea o Faafetai Talosaga na fai i lo latou nuu ina ua ia faaoo ni manu’a tugā i se isi taulealea o le nuu i lona faaaogā o se agaese.
Ae o le faasalaga a le faamasinoga e 2 tausaga ma masina e fitu i le falepuipui ina ua faamaonia moliaga o le umia e Faafetai o se ‘au’upega mata’utia o se agaese na ia faaoo ai manu’aga tugā i le taulealea na aafia.
O le masina o Me o le tausaga nei a o faatali se taavale a lē na aafia e alu ai i lana galuega, ae faafetaui ai e lē ua nofosala ma nisi tagata ma faia ai se fetufaaa’iga.
O le fetufaa’iga lea na tupu ai ma se vevesi ma muamua ai tu’i e lē na aafia i le faaoomanu’a tugā lē ua molia.
Na vave ane iai nisi i le vevesi ma taofia ai le faifai tetele.
Peita’i o le afiafi o le aso na sosoo ai na savali atu ai lē ua molia ae taliē ane iai lē na aafia ma nisi tagata, oso ai loa ma lona ita aga’i atu ma uu mai se agaese o se sapelu ma faatino loa le solitulafono i lē na aafia.
E lua vaiaso o taofia lē na faamanu’alia i le falema’i, ae ave lē ua molia e leoleo ma faia moliaga.
O Faafetai Talosaga o se tama tane o Faleula ua 26 tausaga le matua ae o lē na faia iai le faaoo manu’a ua 19 tausaga o lona matua.
