Ua faaeaina ma le manuia le taumafai o se tasi o alo o le atunuu, o ia le uluai tamaitai i Samoa ua avea ma Faatonu o le vaega o auaunaga tau vaalele sivili poo le Director of Civili Aviation i le Matagaluega o Fela’ua’iga ma Galuega Tetele a le Malo, le afioga Lauano Yvonne Talaitupu Mariner Viliamu.
Ua faailoa e le matagaluega le iu manuia o a’oa’oga a lea pule sili lagolago ma avea ai ma uluai tagata i Samoa ua na umia faailoga maualuluga tau suetusi i tomai i galuega tau vaalele sivili poo le Civil Aviation Auditor.
E toafitu i latou mai le Pasefika ua ausia lea tulaga maualuga i faailoga tau suetusi i mataupu tau vaalele sivili e aofia ai ma le afioga Lauano Yvonne.
O lona ausia o lea tulaga ua mafai ai e Samoa ona auai i faatasiga faavaomalo e faasino i tomai tau vaalele sivili aemaise o le tu maualuga ai o le atunuu i le vaavaai mai a isi malo i fafo.
O le tasi o vaega tāua o loo totoe mo lea tamaitai o le atunuu o nisi o a’oa’oga e faia i le masina o Novema, ona o ia a’oa’oga e tatau ona faamalieina ai aiaiga manaomia ma talia atoatoa ai loa o ia e avea ma suetusi o le faalapotopotoga a le lalolagi e faasino tonu i lea tomai.
Ua faaalia i se pepa o faamatalaga o le tāua o le laasaga ua ausia e lea alo tamaitai o Samoa ona o le a faaauau ai pea ona mata’itū le galuega tau puipuiga i auaunaga tau vaalele sivili.
