Ua maua le Palemia fou o Niu Sila, ae sili ai le tala fiafia mo tagata Pasefika ua faamanuiaina mo le uluai taimi se tamaitai Pasefika i le tofi Sui Palemia o Niu Sila.
O le iuga lea o le feiloaiga a le pati a le Labour ananafi ma o le Aso Toonai na sau ai tala e na o Chris Hipkins le sui momo’e e sailia mai ai se isi Palemia o Niu Sila faapea le isi taitai o le pati a le Labour.
I le aoauli ananafi na faamautinoa mai ai ua filifilia Chris Hipkins e avea ma le isi Palemia o Niu Sila, ma o se tasi na logologoa lona igoa i taimi o le Koviti a o tulai mai ai e avea ma minisita o le Koviti.
I lona tulai mai ai, ua ia filifilia ai Carmel Sepuloni e avea ma ona sui, ma o se mitamitaga ia Carmel o ia o le tagata Samoa, Tonga faapea lona itu palagi le fai ai o ia ma Sui Palemia.
O ia o le uluai Pasefika ua filifilia e avea ma Sui Palemia o Niu Sila, ma o le tamaitai lona tolu lea ua tauaveina lea tofiga.
I finagalo faaalia e le gata i taitai Pasefika i le malo ae faapea tagata taitoatasi i luga o le social media, o le tulai mai o Sepuloni ua o se faamanuiaga lea i le komiuniti Pasefika.
