O se alo o Samoa, a o se tupuaga Pasefika, le faletua ia Hon Barbara Edmonds, ua tofia nei e le faigamalo e seei i nisi o tofiga tetele i totonu o matagaluega a le malo.

E ese mai isi ona tofiga e tele faaminisita o loo tofia ai, ae o lea foi ua ta’ua mai le see o Hon Edmonds i le tofiga o le Minisita o Tupe Maua (Revenue), ina ua faamavae lē sa tauavaina e tofiga minisita o lea matagaluega, Hon David Parker.

I se faatalanoaga ma le tamaitai minisita i le taeao ai i lana taimi masani i luga o le Radio Samoa, na ta’ua ai e Hon Edmonds ina ua fesiligia pe o lava lona malosi na te tauaveina ai nei tofiga e tele, aemaise lava i matagaluega nei o mea tau tupe, ae na saunoa Edmonds, o le itu lea na te faafetaia ai ma talisapaia le tausiga ane o ia o se tamaitai Samoa mai ona tupuaga, ua ola ane ai o se tamaitai e malosi ma nofosauni e unai ma tauave soo se tofiga e lafo mai na te tauaveina.

Ma o lona tulai mai e tauave uma nei tofi, e pei o le avea ma Minisita o le Atina’e o le Tamaoaiga (Economic Development), Minisita o Tupe Maua (Revenue), ma le Minisita Lagolago o le Matagaluega o Tupe (Finance), ua avea ai nei o ia ma uluai tagata Pasefika i totonu o se faigamalo, ua tauaveina nei tofiga o ni matagaluega tetele i se faigamalo.

Saunoa Edmonds, ona o lona foi background poo ona tomai tau loia i le itu tau tupe ma lafoga, o se tasi o mafuaaga ua fetau ai le tuu o ia e vaaia nei tofiga.

I le taimi e tasi na ia toe faailoa lava le tele o le lagolagosua a lona aiga i lana galuega ma ona tokiga ua iai nei.