Vision New Zealand – o le igoa lea o le pati ua faamautinoa mai e lona ta’ita’i ia Hannah Tamaki o le a tauva i le faigapalota o le tausaga fou.
I se pepa o faamatalaga o loo faasilasila aloaia mai ai e le Hannah, lona talitonuga ma o loo lototele i taumafaiga a le pati.
O le 2019 na lesitala ai le pati lenei i le masina o Tesema, ma e faapea o se tasi o pati i lalo o faamalumaluga a le Freedoms NZ.
E ese mai le pepa o faamatalaga, o lea lava foi na faasilasila e lona toalua, Brian Tamaki i le solo tetee na faia ananafi i Ueligitone ma e faapea e lua pati ua iai o le New Nation Party ma le Vision NZ ma ua ioe atu foi le New Zealand Outdoors and Freedom Party.
Peitai, e oo ane anapo ae sau le post a le Outdoors and Freedom Party i luga o lana Facebook page, ua fai si vavevave tele o le faifeau ma le faailoa o loo iai faatasi ma i latou i lalo o lea faamalu.
I lea post o loo ta’ua ai o lea lava e faia a latou galuega ma le filemu ma o loo iai lava pea faatalanoaga e tatau ona faia muamua ma o lea foi ua mae’a imeli iai i le vaiaso talu ai.
Ua lē iloa ai nei la le sa’o, pau o lea e lē o se amataga lelei lea mo pati laiti a o tapena atu ai i le faigapalota tele i le tausaga fou.
