O le sini lea o le faalauiloa ua amata ma faamoemoe ia siitia le fuainumera o tagata Maori ma Pasefika i le va o le 60 i le 74 e agai mo ia siaki. 

E silia ma le 835,000 tagata Niu Sila e agavaa mo siaki nei, peitai pe na o le ‘afa o loo faaaogāina siaki maua fua e faia i fale o aiga. 

Molimau se tasi ua maliu ai lana avā, toe maua ai ma ia i le kanesa o le gaau, Patrick Loloma Afeaki i tala a le leitio a Niu Sila, ua ia toe aumaia le feau o le tāua o le faia o le siaki ina ia vave iloa ai ma faia togafitiga. 

I le faalauiloa o loo alu nei o loo faamamafa ai foi le tāua o le a’oa’oina o o tatou tagata. 

E silia ma le 1,200 tagata maliliu i le tausaga ona o le kanesa o le gaau, ma o le to’atele o i latou nei o tagata Maori ma le Pasefika. 

O le paketi foi o lenei tausaga na sau ai ma le suiga o le a tuu mai i lalo mai le 60 i le 50 tausaga le matua e amata agavaa ai se tasi mo siaki o le kanesa o le gaau.