E lē o uma ai faafitauli o loo fetaia’i ma tagata faigaluega na omai i lalo o visa faigaluega na pepelo ona fai.
O le itula e 10 o le taeao ananafi, sa tatau ona oese ai ma fale o le Emergency Housing poo fale nei e sailia ma tapena e le Matagaluega a le Social Development.
E na o le lima aso na tuu mai e tapena ese ai ma le faletalimalo, ma o lona uiga ua leai ni galuega toe leai ma ni fale e malu ai.
O le toatele o i latou nei e oo mai lava i le Aso Faraile e lei maua ni galuega, e ui o lea sa faia semina e le matagaluega a le Social Development e fesoasoani iai, faapea ma alauni e maua i le vaiaso.
Ae i suesuega o loo faia i falefaigaluega na pelogia tagata nei, o lea o loo faasolo pea suesuega a le immigration ma ua silia ma le 200 suesuega o loo faia nei.
O faletalimalo nei e tauala mai i le Emergency Housing na faia e agai iai i le mae’a maua ai o alii e 140 o loo faaomiomia i le fale 4 potu moe i Papakura.
I aiaiga ma tuutuuga o faletalimalo nei e totogi e le malo mo Emergency Housing, e mo na o se taimi lē tumau, ma e tatau ona taumafai le tagata o loo fesoasoani mai iai le malo e sailia fale mautu poo long term accommodation e agai iai lea e aofia ai private rentals, peitai o le lavelave o le mataupu lenei o le leai o ni galuega e faafaigofie ai ona talia talosaga mo ni fale.
