O le fai atu e leai i le tagofia o fualaau faasāina, o se autū ua faamamafa i le taumafaiga ua amatamea ai le Malo e ala mai i le matāgaluega o leoleo, falepuipui ma le toe fuata’ina, e mana’omia ai le galulue faatasi o vaega eseese o le atunuu e aofia ai ma le pitolaau a ekalesia.
O le faamalosi’au lea mai le ta’ita’ifono aoao o le Ekalesia Faapotopotoga Kerisiano Samoa le susuga i le toeaina, susuga Enefatu Lesā i le upu faaleagaga na tomua ai le sauniga o le tatalaina o le faalauiloa ua faatāua ai se taumafaiga e tetee atu i le faaaogāina o nakoti poo pauta ma fualaau faasāina.
Ae i le mae’a ai o le sauniga lotu o le faalauiloa i le tetee atu i fualaau faasāina, na saunoa le Sui Minisita o le Matāgaluega o Leoleo, Falepuipui ma le Toe Fuata’ina, ma ia faailoa e iai lona talitonuga ua lava tapena tupulaga talavou o Samoa e tula’i mai e faatāua le autū o le fai atu e leai i le faaaogā o fualaau faasāina.
Le afioga i le Sui Minisita o le Matāgaluega o Leoleo, Falepuipui ma le Toe Fuata’ina, afioga Mulipola Anarosa Ale-Molioo.
O le polokalame faipaaga a le matāgaluega o leoleo a Ausetalia o loo fesoasoani i le faatupeina o le polokalame faalauiloa e tetee atu ai i fualaau faasāina.
Sa faailoa e le Komesina Maualuga o lea malo i lana saunoaga i le tatalaina o le faalauiloa, o lana ulua’i feiloa’iga ma le Palemia o le atunuu susuga Laaulialemalietoa Leuatea Polataivao Fosi Schmidt faapea le sui minisita o le matāgaluega o leoleo sa faailoa atu ai e le ta’ita’i o le malo, o le tasi lea o faamuamua a le faigāmalo e mana’omia ai le fesoasoani a Ausetalia o le tafiesea o laau ma fualaau faasāina.
