Ua mautinoa nei le avanoa a le ‘aulakapi a le atunuu, le Manu Samoa, e taaalo ai i le taamilosaga o le Ipu o le Lalolagi i le tausaga 2027, i le mae’a ai o lana taaloga ma le ‘au a Belgium i le vaveao analeila.
O le taaloga mulimuli foi lea a le ‘au i le tau sa’ilia ai o so latou avanoa, e pei ona taumafai mai ai.
O lea taaloga na faatautaia i Dubai, ma o le taaloga mulimuli foi lea e iloa ai le saofagā atu o le Manu pe leai.
O lea manumālō ua avea ai le Manu Samoa ma ‘au lona 24, ma o le ‘au mulimuli foi lea ua saofagā atu mo le taamilosaga tele i le tausaga e 2027.
O le lona sefulu ai lea o taimi ua mafai ona auai Samoa i le Ipu o le Lalolagi talu ona auai mai i lea taamilosaga i le tausaga e 1991.
O loo tulaga 17 Samoa i le faatulagaga o ‘au o le lalolagi i le lakapi iuni i le taimi nei.
E faatautaia le Ipu o le Lalolagi o le taaloga lakapi e pei ona sa’ili avanoa ai Samoa i Ausetalia mai le aso 1 o Oketopa agai i le aso 13 o Novema 2027, ma o le a vaaia le taaalo ai o ‘au e 24, e 6 pulu poo pools ta’i 4 ‘au o le a iai.
Māua i faamatalaga, i le saofagā ai o Samoa, o lea ua mautū le auai o le ‘au a le Manu Samoa i le taamilossaga fou ua tā’ua o le World Rugby Nations Cup, ua fuafua e amata i le tausaga fou 2026.
E aofia ai ‘au a Kanata, Chile, Portugal, Tonga, USA ma isi.
