O le ripoti lata mai i le tulaga ua iai le pepesi o le faama’i Koviti19 i Samoa mai le Soifua Maloloina ma le Komiti o Faalavelave Faafuasei ua faapea mai le ripoti o le Aso Sa 20 Mati i le itula e 2pm na faamauina ai le faaopoopo ai o le to’a 85 fou ua aafia i le atunuu lautele ma ua siitia ai le aofai o i latou ua aafia i le faama’i i le to’a 196 e aofia ai ma le to’a 15 na aafia muamua i le faigamalaga na taunuu mai i Niu Sila i le Aso 6 o Mati.
O i latou ua maea ona fai suega poo tests e to’a 2207 talu mai le Aso 18 o Mati i totonu o nofoaga faapitoa e 6 faatasi ai ma nisi o nofoaga faapitoa o le Soifua Maloloina.
Ua faamaonia e le Matagaluega o le Soifua Maloloina mai le to’a 181 o i latou ua aafia i le atunuu lautele ina ua pepesi i tua le faama’i o le to’a 62 o i latou ua aafia na faamaonia mai suega poo test sa faia i nofoaga faapitoa e 6 ua faatulagaina faatasi ai ma le 119 o isi ua aafia na faia o latou suega i le falemai ae lē aofia ai le to’a 15 o i latou na malaga atu i Samoa.
O le Ofisa tutotonu o le Koluse Mūmū o loo faamauina le maualuga o le pasene o i latou na faatino ai o latou suega ua aafia i le siama o le koviti19 e tusa lea ma le 47% pe a faatulaga pasene o ē ua aafia. I le taimi nei o loo faaauau pea suesuega ma sailiiliga a le Matagaluega o le Soifua Maloloina mo i latou e 428 sa fesootai vāvā lalata ma i latou ua aafia i le siama.
