Ua ono soli e le isi taitai o le pati a Maori tulafono a le Palemene lea e lē mafai ai ona faia ni lafoga e faatatau i taualumaga o faamasinoga.

O le aso ananafi na fesiligia ai e Rawiri Waititi se tasi o mataupu o loo i taatia nei i le faamasinoga.

E lua tulafono o le Palemene poo Parliament’s Standing Orders 116 ma le 418(y) ma na tuuaia ai e le taitai o le ACT, David Seymour ia Waititi i lona faatautee e lē gata o le maota ae o le tulafono lea e lē mafai ai ona talanoaina mataupu nei.

Ae na ta’ua e le Fofoga Fetalai, Adrian Rurawhe, e lē gata na ia faatoafilemuina le mataupu ae na ia tuu atu foi le faitalia i le taitai o le ACT e mafai ai ona faaulu sana faaseā aloaia.

O le finau a Seymour ananafi, e tatau ona faasala le taitai o le pati a Maori.