O le talitonuga lea o sui faipule e toalua o le Vaegafaaupufai o le HRPP na faailoa i le fonotaga ma tusitala i le aso ananafi. Ua faamavae atu le igoamatua ia Ale Vena Ale o le suifaipule mai le itumalo o Faleata Numera 4 faapea ai le Tofa Tuu’u Anasii Leota o le sui faipule mai le itumalo o Siumu, i le HRPP.

I a la tusi faamavae o loo atagia ai mafuaaga e aofia ai le see ese mai o le Vaega Faaupufai mai le faavae na mafua ai ona faatu, ia ta’imua e puipuia aiatatau a tagata. E le gata i lea o le pulepuletutu, e le fia faalogo le taitai o le Vaega i ni manatu o ona sui e faatatau i le mataupu tau taitaiga.

O loo faapea mai le Sui Faipule mai Siumu, o se sui sinia o le Vaegafaaupufai, o le faiaina ai o le HRPP i le Palota o Aperila 2021 o le avanoa lea sa tatau ai i le taitaiga ona toe asia le mafuaaga na faavae ai le HRPP, ma le tulaga o tu ai ma faia loa ni suiga i vaega o loo manaomia ai le fesoasoani.

“Ou te talitonu ua see ese mai le Vaega Faaupufai mai le tulaga sa ala ai ona faatuina na te faia. Ua leai se faatuatuaga o tagata palota sa palotaina i matou i le Vaega Faaupufai ma ona sui o i latou o ni muaau e puipuia aiatatau a tagata”.

Sa faailoa foi e pele le vaega faaupufai, aemaise le galuega fita sa faatino mai e sui ma e lagolago i le tele o tausaga, peitai e talitonu ua lafoai e le Vaega Faaupufai lona talitonuga ma lona tāua. Ona o lea tulaga ua atagia mai ai ua le puipui i aiatatau a tagata Samoa uma, ae ua na o ē ua faapito iai.

E talitonu Tuu’u o le lē talia e le Vaega Faaupufai o le faiaina i le palota i lalo o le taitaiga a Tuilaepa, o se tulaga ua faamaasiasi ai ma se faataitaiga leaga lea mo le HRPP ma e lagolago iai aemaise o tagata o Samoa. Ua fai toatasi foi e Tuilaepa le taitaiga, ma ua leai se faalogo i finagalo o Sui o le Vaega, o lea itu ua atagia ai le faamalosi ona faia o mea, ua faagata manatu ma lagona o sui taitoatasi ae ua na o ē o loo ‘au atu ma mulimulitai ia faiga e amanaia.

O ia mea o loo faaalia e le sui faipule o Siumu sa ia lu’iina i le tele o taimi i fonotaga faafaletui. Ua faailoa foi o le tetee pea o Tuilaepa i faaiuga talu ai a le Faamasinoga i le faalemigao faapea foi le Palemene, ua atagia ai le musua e fai le mea tonu, ma faamavae ese ma le ta’ita’i ina ia fai ma se faataitaiga lelei, ma ia agai i luma le Vaega Faaupufai.

O loo atagia manino mai ai le musu tele ia maua se avanoa e mapuea ai le vaega faaupufai e ala i se taitaiga fou e faatula’i. O le tulaga tonu foi lea ua vaaia ai le vaai maualalo i sui ma o latou agavaa ma tomai faata’ita’i. Ua faaalia e Tuu’u, ua le o toe vaaia ma iloa tulaga lelei faalepulega, ma amioga pulea i le ta’ita’iga o le Vaega Faaupufai.

Ma ua ‘iva le faafofoga a le atunuu i ia mea, ua manaomia se fatuga fou, ni upu fou na te tauaveina mai suiga lelei ma se faamoemoe lelei mo le lumana’i e ala i le faaoloatauina o ona tagata.

Ua faailoa e Tuu’u o loo iai foi faiga faaalatua, ma o loo manaomia le faailoa ina ia toe faatumau le faamaoni i le Vaega Faaupufai, ma toe faafoi mai le faatutuaga o tagata ua mou. Ua filifili sui faipule ua faamavae e agai atu e avea ma faipule tutoatasi i le Palemene o Samoa.