Ua faamautinoa mai e le malo e moni ua taofia nei le totogiina mai o First Home Grants, ma ua aloaia ai lava i le aso ananafi.
O lea na muamua lipotia e le Newshub i le afiafi o le Aso Lua, ae oo mai ananafi ua faamaonia mai e le minisita o fale, Chris Bishop le lē toe maua o lea fesoasoani lea e oo atu i le $5,000 poo le $10,000 foi e mafai ona agavaa ai nisi o tagata e fia faatau uluai fale motu.
I le aloaia ai o lea suiga ananafi, ua faamautinoa mai ai e le minisita, o talosaga ua tauaaoina nei mo lea fesoasoani o le a iloilo pea, ae mo nisi talosaga fou, e lē toe taliaina.
O le faamuta ai o First Home Grants ua fai mai ai le malo o le a faasao mai ai le $245 miliona i totonu o le fā tausaga mai le 2024 e oo atu i le 2028.
O suiga foi nei o le a faaui uma ai tupe sa alu i fesoasoani nei agai i fale a le malo lea o le a pulea e Community Housing Providers ae lē o le Kainga Ora.
E ui la ua leai se First Home Grants, e lē o aveesea ai e le malo le First Home Loan Scheme poo nonogatupe e maualalo le deposit mo tagata agavaa e fia faatau uluai fale motu.
Puna o Faamatalaga: Government announces immediate end to First Home Buyer Grants to fund 1500 social housing places | Newshub
