E le o toe mamao taunuu fuafuaga a le Auckland Transport lea o le a tuu mai ai i lalo le saoasaoa faatapulaa o nisi o auala i Saute o Aukilani.
O Oketopa lea na faailoa mai ai fuafuaga a le pulega o le a suia mai ai i le 30km le saoasaoa e tatau ona iai mo auala uma o Manurewa i Sasae, Weymouth ma Clendon Park.
Mai le sooupu o lea ua mautinoa o le aso 26 o le masina a sau o le a amata faamamaluina ai ma o suiga nei o loo faia uma i nofoaga e iai fale o aiga, latalata i aoga faapea ai ma le tele o auala o loo savalia e tagata lautele.
E iai nisi e nonofo i nuu nei e le o fiafia iai i lenei suiga ma le tele ua telegese tele, ma e faapea foi molimau a nisi e asia nuu nei mo galuega.
Ae e iai foi i latou o loo lagolagoina ma le tala o se faaiuga lelei ona o le tele o avetaavale saoasaoa.
O Iuni ma Iulai o le tausaga nei na amata aloaia ai suia nei i le tele o auala o Aukilani lea ua silia ma le 800 auala ua faia ai.
