O le solaaga tele a pagota mai le falepuipui i Tanumalala lea na molia ai le alii pagota o Sio Agafili i le faaoo manu’a tuga i le faaaoga o se tolopa, i se pagota na taumafai e a’e i luga o le pa i le fia sola ese, ua le faamaonia.

Ua mafua lea faaiuga ua taunuu iai suesuega a le faamasinoga sili, ona ua le mafai e leoleo ia latou mau na tuuina atu ona faamaonia e aunoa ma ni masalosaloga tatau le latou moliaga.

O Mati o le tausaga e 2020 na tulai mai ai lea solaaga na aafia ai pagota e toa 29, ae na vave ona toe maua uma ma faafoi i le falepuipui.

I suesuega a le faamasinoga na tuuina atu ai e leoleo molimau e toa sefulu, e aofia ai ni leoleo se toalua ma ni leoleo o le falepuipui faapea nisi o pagota.

Peitai o le silasila a le faamasinoga e ui sa ioe lē na molia sa ia umia le tolopa sa ia taina ai le pagota na faamanualia i se taumafaiga e taofi le sola ese mai le falepuipui, ae o mau a leoleo sa le mafai ona faamautu ai le gaioiga na faia e Sio Agafili, ona e iai foi isi pagota na faaoolima i lē na aafia i manu’aga i le ulu, ma se vaega o ona foliga.

E pei ona silafia o lē na molia lea ua faaleaoga lona moliaga na tuuaia ai, o loo tālia sana mataupu ua faaulu atu i le faamasinoga ua tuuaia ai le pulega o le matagaluega o leoleo ma falepuipui, i le silia o tausaga na nofosala ai, ae ua leva ona tatau ona magalo.