Ua folasia i se tulaga lautele se faanoanoaga o le taitai o le Mālō ona ua lē logosa’ia e le Peresetene o le Faamasinoga o Fanua ma Suafa  faapea le Komiti o Galuega a lea faamasinoga le tuualalo a le Tamaitai Minisita o Faamasinoga ina ia taatia le faatautoina o le Sui Peresetene ua filifilia seia maea ona laolao i tapenaga i auala faaletulafono faaauau ai vaega uma o lea tofiga. 

O le finagalo o le afioga i le tamaitai Palemia afioga Fiame Naomi Mataafa ma faailoa i le tino masani ma tusitala ina ua maea ai ona faatautō le afioga Faimalomatumua Mathew Lemisio i le

tofiga Sui Peresetene o le faamasinoga o Fanua ma Suafa. 

Taua e Fiame “E mafai foi ona o’u faaalia mo le faafofoga mai a le atunuu sa iai se taumafaiga e sainia e le Ao Mamalu o le Mālō le pepa faamaonia mo i latou nei ua filifilia ae peitai ua logosa’ia le finagalo o le Ao o le Mālō i le fautuaga lea a le Loia Sili e le’o iai se tulafono o loo faavae ai filifiliga o tatou tofi ia a le faamasinoga o Fanua ma Suafa.

O le mea e tau māmā mai ai se manatu ona o Lea ua tatou oo atu i le faaiuga o le tausaga faigaluega, mo le Mālō aemaise foi ia le galuega a le faamasinoga ma atonu e maua ai se taimi e mafai ai ona faia ni sailiiliga ma ni feutagaiga talafeagai e fōia ai foi lea lu’i ua faatulai mai ma nofo lelei ai le faagasologa o tatou faamasinoga o fanua ma suafa.”

Sa usitaia e le Pulega ma le aufaigaluega a le Matagaluega a le faamasinoga le finagalo o le Minisita ina ia le auai seisi i le tapeanaina ma le faatinoina o lea faatautoga ona e solitulafono.

I le feiloaiga a Tusitala ma le Palemia ma ia faailoa ai o loo faia se sailiiliga a le Ofisa o le Loia Sili a le Mālō poo ai o loo i tua i se gaioiga ua māua i faamaumauga a le Ofisa o le Loia Sili ua iloa ai e ese le tulafono na pasia e le Palemene e tuu mavaevae ai Pulega o le faamasinoga ese le tulafono ma tuuina atu mo le sainia e le afioga i le Ao o le Mālō. 

Taua e Fiame “O’u te manatu i ala o mea procedure, mea muamua lena e silasila iai le Loia Sili poo le a le mea na tupu aisea ua ese ai le tulafono ma pasia e le Fono ese le tulafono lea na oo e saini ai le Ao o le Mālō.

O fea o le faagasologa lena na iai se mea na tupu, a’o ai foi na aafia ai i lena mea. I aafiaga la, auā e lē lele mai le pepa lele fua mai, e tapena e tagata faaoo i le Ao o le Mālō, e iai foi la aafiaga foi lea o tagata sa feagai ma le faagasologa o ia galuega atonu o le isi foi vala lena e silasila iai le tamaitai loia. Ae i lea mea foi ia o le tupu o se mea faapea e iai se manatu o le loia sili e lei tupu muamua ia tatou ma o lea la e fia saili ai, pe na tupu i sesi mea, ao ai na iai , e iai nisi aemaise a loia, o a faiga faalaetulafono e momoli ai lea mataupu i se tulaga e faamalamalama ai.”

Faaalia foi e Fiame e lē tatau ona tagofia e le Sui Peresetene ma le faamasino fou ua filifilia le suesueina o ni mataupu a aiga o loo faatoai i le faamasinoga o Fanua ma Suafa ona e le’o aloaia faaletulafono le faatautoga ua maea ona faatino i se auala na fai faamalosi e le Peresetene ma le Komisi o galuega a lea faamasinoga.