Ua iai nei i le lanu mūmū lapata’iga o timuga mamafa mo vaega o le motu i Mātū e amata atu i le aoauli nei, ma e oo atu i le 320mm le loloto o timuga o loo valo’ia o le a totō i totonu o lenei faaitulagi.
I le taeao analeila, sa aumai ai e le MetService lapata’iga i timuga malolosi ma le faaupuga, e ono toe suia i le matuā malolosi na timuga ma oo i le lapata’iga lanu mūmū.
Ae i le te’a laitiiti o le 10am analeila, ae sau loa le isi lapata’iga a le vaega a le vaaitau, ua oo nei i le lapata’iga lanu mūmū, o le vaega pito sili ona maualuga lea i tulaga o lapata’iga pe ua oo i se tulaga ua mata’utia.
O vaega ua aofia i lenei lapata’iga lanu mūmū, e pei o le faaitu o Kaikohe mai le Doubtless Bay e oo atu i Whangārei, e amata mai le 4pm i le afiafi nei se’ia oo atu lava i le Aso Faraile.
E ono agi mai savili malolosi ma pāpā faititili ma totō malosi timuga i le aoauli o le aso a taeao, le Aso Tofi, ma o le a lē gata i na faaitu, ae oo ina sosolo atu foi i isi faaitu o le atunuu mai le Aso Tofi e oo i le Aso Faraile.
O le maualuga lea ua iai nei lapata’iga e ono tula’i mai ai foi tulaga lamatia o le soifua pe a oo ina malolosi le tatafe o vaitafe ma i’u ai i lōlōga ma eleele solo.
E faatalitalia foi le faalavelavea ai o feoa’iga pe a oo ina faaleagaina ma motu nisi o auala ma lē mafai ai ona toe sopoia.
E lē gata i lea o le a siisii foi le tai ma fafati mai galu maualuluga i le agi malolosi mai o savili.
O loo ta’ua foi e oo ina malolosi atili le agi o savili ma aafia ai vaega o le Motu i Saute, aemaise lava i Tasman ma le West Coast.
Ua fautuaina malosi tagata ia aua ne’i taumafai e sopoia ni vaega e malolosi ai lōlōga ma taofi le toe soona femalagaa’i solo e aunoa ma ni māfua’aga talafeagai.
Puna o Faamatalaga: https://www.1news.co.nz/2026/03/25/threat-to-life-red-warning-for-parts-of-northland-320mm-of-rain-possible/
