Ua faamānava e le Atua galuega a le afioga Tusa Aiono Misi Tupuola, o se tamalii sa tele tausaga o galue i le Matagaluega o Leoleo ma Falepuipui ae sa ia tauaveina foi le tofi Faipule o le itumalo o Falealili i le paeaiga o le tausaga e 2011 i le 2016.
Sa galue foi i le pulega o felauaiga ma taavale afi sa avea ai ma failautusi o le komiti faatonu o felauaiga, ma sa lotolotoi ai i le tele o suiga ua faatino nei e pei o le suiga o le itu auala e feoai ai taavale ma le faaaogāina o taavale foeuli taumatau.
O le afioga Tusa Aiono Misi Tupuola sa avea ma se tasi o leoleo satini sinia a o galue i le matagaluega o leoleo, ae o se tasi e talenia foi i le musika e pei ona sa avea o se tasi o le faaaili pu a Malu o le Malo. O lona taimi i le tofi faipule o le Palemene sa avea ai ma Minisita lagolago o le Matagaluega o Felauaiga ma Taavale afi.
Sa avea o ia ma se tasi o Faipule o le vaega faaupufai e puipuia aiātatau a tagata, ma sa toe tauva i le tofi o lona itumalo i le palota tele o le tausaga e 2021.
O loo feagai ona aiga ma le fanau ma tapenaga o ona toe sauniga.
