Na faate’ia le to’atele o le atunuu i le oo mai ai o le tala faanoanoa, i le tuumalo o lē sa avea ma ta’ita’i o le atunuu mo le tele o tausaga, Jim Bolger.
Maitauina le tuu mai ai o faamaisega a le alii Palemia, Christopher Luxon, e ala i saga tusitusiga i luga o upega tafa’ilagi.
Faailo e Luxon lona agaga faafetai mo le soifua auauna o lea tamālii i lana auaunaga ma lana ta’ita’iga ua tele ina mautū ai atina’e ma le tamaoaiga o le atunuu.
E pei ona ia faamatalaina, o Jim Bolger o se toa, o se tagata na molimauina e le atunuu le mata’ina o lana ta’ita’iga ma le mauaa o ana taumafaiga mo le manuia o Niu Sila.
Faamatala e le Minisita o le Va i Fafo, Vaovasamanaia Winston Peters, o Jim o se tagata e lē solomuli lava ma sana faamatalaga, o lona uiga o lea tamālii o se tasi na savali lava e faatino ana folafolaga.
O se vaega na manatua ai pea e Peters, Jim i taimi a o galulue faatasi ai o se malo soofaatasi – coalition.
Faaopoopo Vaovasamanaia, o se tagata na taula’i i le manuia lautele o Niu Sila aemaise ona tagatānuu, e oo lava i le taimi na faamavae ai o ia mai le li’o o upufai o malo.
I tala’aga o lea tamālii, na soifua mai o ia i le aai o Ōpunake, o se tagata e iai faasinomaga Aialani, ma e tusa ai ma lipoti, o se tagata na amata ona atia’e lona ola su’esu’e ma ona agavaa e malamalama ai i le tele o matāupu tau atina’e i le itu tau faato’aga, ona o se tasi o faifaato’aga ma fai lafumanu.
Na ofi atu Jim Bolger i upufai o malo i le tausaga 1972 i lalo o le faamalu o le vaega faaupufai o le National Party, ma o lea na molimauina ai lava le malosi o ana taumafaiga ma i’u ai lava ina filifilia o ia e avea ma Palemia i le tausaga 1990 se’ia pā’ia le tausaga e 1997.
Na maliu Jim i le 90 ai o tausaga o lona soifua.
Puna o Faamatalaga: https://www.rnz.co.nz/news/national/576040/former-prime-minister-jim-bolger-dies-aged-90
