Ua avanoa le tofiga Peresitene o le sosaiete a alii ma tamaitai tausi soifua faauuina o Samoa ina ua lipotia ai le tuumalo o lē sa avea ma Peresitene o le sosaiete, le faletua o Solialofi Papalii.
O le Aso Gafua na valaau ai le matai i le faletua a o feagai o ia ma gasegase.
O se tala faanoanoa mo tausi soifua uma o le atunuu auā o se tasi o tina sa galue ma finau mo le lelei o tausi soifua, ae o se tasi foi sa lagolago i le sailia o fofō i faafitauli o lea galuega poo se tautua i le matagaluega a le soifua maloloina.
O le tausaga e 2017 na avea ai Solialofi ma Peresitene ina ua maliu lē sa tauaveina le tofiga mo le tele o tausaga le faletua o Fesola’i Faamanatu Nielsen.
E valaau le matai sili i le faletua o Solialofi sa avea ma Peresitene o lea sosaiete ua faamaonia e le Malo le faatulagaga poo le structure fou mo le matagaluega o le soifua maloloina lea ua siitia ai le tulaga o tausi soifua.
O se faatulagaga na mae’a ona fausia ae sa iai vaega sa toe fetuuna’i ona sa lē talia e le sosaiete o tausi soifua nisi o aiaiga e faasino i le auaunaga a tausi soifua.
O le Peresitene ua tuumalo o se tasi sa lotolotoi i le toe faatulagaina o tofiga ma auaunaga a lea matagaluega tele a le Malo.
