O le ono tausaga talu ai sa afea ai Samoa i le asiasiga taualoa a le Faauluuluga Aoao o le Ekalesia a Iesu Keriso o le Au Paia o Aso e Gata Ai i le lalolagi, le afioga i le Pelesetene o Russel M Nelson.
Sa feiloa’i atu ai o ia i lea malaga i le afioga i le Ao Mamalu o le Malo ma lana Masiofo, faapea ta’ita’i o le tatou malo, aemaise o ta’ita’i ma tagata tapua’i o lea ekalesia i Samoa.
O le a manatua lea ta’ita’i faalelotu e ona tagata tapua’i i Samoa aemaise lo tatou atunuu i lea asiasiga na faamalosi’au ai i le tāua o le ola faaleagaga ma le ola faapa’iaina.
O se tala faavauvau i le tapua’iga a ta’ita’i ma tagata lotu o lea Ekalesia i le atunuu ma le lalolagi le tuumalo ai i le Aso Sa na te’a nei, o Pelesetene Nelson i le 101 o tausaga o lona soifua.
Ua faaalia i tala faamaumau a le ekalesia, o le Pelesetene lea ua pito tele tausaga o lona soifua sa avea ma ta’ita’i poo Faaao o le ekalesia aoao i le lalolagi.
