I le silia i le 34 tausaga o galue le afioga Vaovasa Lapi Seumanufagai Filo i le Matagaluega o Leoleo, Falepuipui ma le Ola Toe Fuata’ina, o ia o se Malu o le Malo ua lauiloa e le to’atele o le tatou atunuu, ona o lana tautua tau puipuiga o le saogalemu sa galue ai mo lē sa avea ma Palemia o le atunuu le susuga Tuilaepa L Sailele Malielegaoi.
O le Aso Toonai na te’a nei na faamanavaina ai e le Atua lona soifua galue i le Matagaluega ma le ola nei, i le 63 tausaga o lona soifua.
O le tausaga e 2020 i le masina o Iulai na tauaao atu ai le pine a Malu o le Malo poo le police badge i le afioga Vaovasa Lapi faatasi ai ma nisi o leoleo sinia o se faailoga o le amana’ia o le latou tautua faaleoleo i le tele o tausaga.
O lana galuega sa lima taumatau iai lē sa avea ma Palemia e lē gata i le puipuia o lona saogalemu ae o le faafoeina o lona Sa poo le taavale i soo se taimi, o se isi lea o vaega tāua i lona soifua galue i le Malo i le tele o tausaga.
O ia o se tasi sa tautua i le maligi a Amerika mo ni tausaga, ona foi mai lea i Samoa ma faaauau lona tomai a’oa’oina tau fitafita i le Matagaluega o leoleo.
E tuumalo o ia o loo umia le tulaga faaleoleo o le Police Superintendent.
