Ua toe feoai vaalele i Fagalii ma o le faatolu ai lea ona tapuni ma toe tatala le malaevaalele.
I le silia i le 30 tausaga o faaaoga ae oo ane i le tausaga e 2005 ua tapuni, na toe tatala mulimuli ane ai ae na toe tapuni i le faaiuga o le tausaga 2019, oo mai ia Me o le tausaga nei 2023 ua toe tatala mo malaga i Savaii ma Amerika Samoa.
O le toe tatalaina o lea atinae a le Malo na faalogoina ai e le Malo ma ē na auai i le sauniga le tuualalo a le faafeagaiga na taitaia le sauniga lotu, le tatau i le Malo ona toe silasila i le saogalemu o le nuu ma aiga o alala tulata i le malaevaalele.
Peitai i le saunoaga a le Minisita o Galuega Tetele ma Fela’ua’iga faapea pulega o malaevaalele na ia faailoa ai le mautu o le saogalemu o le malaevaalele i Fagalii, ae o le a taatia atu le tuualalo a le faifeau.
Se vaega o le saunoaga a le Minisita o Galuega Tetele, Fela’ua’iga ma pulega o malaevaalele le tofa Olo Afoa Fiti Vaai i le toe tatalaina o le malaevaalele i Fagalii.
Na taualuga le sauniga i faaaloaloga faaleaganuu na tapena ma saunia e le paia maualuga o le afioaga o Fagalii, lea sa faasopolia uma ai mamalu faalemalo ma malo valaaulia na auai.
O le aso 6 o le masina fou o Iuni e pei ona faailoa e se tasi o pailate sinia o le kamupani vaalele o le Samoa Airways, o le a amata ai malaga i Fagalii.
O lona uiga o le vaiaso fou i le Aso Lua asau.
O le masina o Iulai e pei ona faailoa e se sui o le kamupani vaalele o le Talofa Airways o le a toe foi ai ana malaga masani i Fagalii i le va lea ma Amerika Samoa.
