Ua faaali le lē fiafia o le taitaifono o le FAST o le Minisita foi lea o le Kapeneta Laauli Leuatea Polataivao Schmidt i se gaioiga a le Faatonu Sili o le Matagaluega o Aoga Taaloga ma Aganuu e tumau pea le tapunia o Aoga mo le isi lua vaiaso ae ua uma na saunoa le Palemia e tatala uma i le vaiaso nei aoga a fanau a le atunuu.
O se faasalalauga i le afiafi po o le Aso Faraile ua mavae na toatele ai matua ua lē mautonu poo fea o iai le sa’o ae na mulimuli ane toe faatalise leisi faasalaulauga a le Faatonu Sili a le Matagaluega ma faailoa ai e faaleaogā lana faasalalauga muamua ae o le a amatalia lava aoga i le vaiaso nei.
Ua faamatalaina e le taitaifono le susuga Laauli lea fesasia’i o le Faatonu Sili o se ‘aitui i le malo ma ave ai lana tuualalo i le faauluuluga o le Matagaluega afai na te lē talia le faaiuga a le faigamalo e sili ona faamavae ma le tofiga.
O le manatu lea a Laauli i le polokalame a le EFKS TV o le Soalepule i le faaiuga o le vaiaso na te’a nei
“E le’o se mea e toe tau fai atua se finagalo o le Palemia ma le Kapeneta poo le afioga i le failautusi a le kapeneta o ia foi lena o le sui taitaifono o le komiti, a iai la le tagata na te lē talitonuina ma ana lē usitaia tulaga o mea lea e avatu ia fai le mea e sili ona filemu, e lē one tagata foi le ofisa o aoga, e tuu sao a le mea afai e lē fia auai ma lē fia faalogo i upu ma mea ia e faatonu atu e le malo fou faamavae, faigofie lena, ona pu’upu’u ai lea o le mataupu. A’o ī e faa’oloataua ai finagalo o isi pule ma faauluuluga o le Matagaluega, o le faiatu o le tonu e tagata e faia le tonu ae ‘aitui i le malo, o la’u lena tala ae o le a lafo le kapeneta mo se latou faaiuga.”
O lea ua molimauina i faasalalauga o avanoa o Ofisa Sili o Pulega o Matagaluega faapea Faalapotopotoga a le malo le faasalalau ai o le avanoa o le Ofisa Sili o le Matagaluega o Aoga Taaloga ma Aganuu faapea ma le tofiga Loia Sili a le malo.
