O se alii sa tuli ni ona faasalaga i le falepuipui i solitulafono o le gaoi, ma le talepe fale, faapea lona umia o laau faasāina o le maruana, o loo sailia nei e leoleo ona o se isi gaioiga solitulafono ua tuuaia ai, o lona fao faamalosi lea o ni meatotino a se tina mai le atunuu o Niu Sila sa tafafao mai i Samoa ma lana fanau e toalua.
O le Aso Sa na tuua ai e lea tulisi le atunuu ma toe foi ae o loo faaauau pea suesuega a leoleo i le fia maua o le alii o Silao Leleiga poo Silao Faaleleiga mai afioaga o Nofoalii, Saanapu, Sapunaoa, Sala’ilua, ma Vaitele fou.
Ua faailoa e leoleo o le ato poo se handbag a le tina tulisi na fao e le alii o Silao, ae o loo iai ni pepa tāua tele, faapea isi meatotino aoga. O le Aso Sa muamua o Oketopa sa alu ai se savaliga a le tulisi ma lana fanau laiti ae feiloai ma le alii o loo sailia nei, ma sa sagisagi fiafia ane i le tina tulisi ma ona alo, ma le lilo i manatu o le tulisi o le a tulai mai ai se gaioiga le manuia o le a le galo i lana tafaoga i Samoa.
O se tasi lea o gaioiga solitulafono ua aafia ai le atina’e o tagata tafafao ae o lea faato’a toe tatala le malaga mai o tagata tafafao mai fafo, o a latou seleni e faaalu i auaunaga eseese e fesoasoani malosi i le toe faatulai mai o le tamaoaiga o le atunuu ua 2 tausaga ma masina o olopala i aafiaga ogaoga ona o le faama’i koviti.
Le sui Komesina o leoleo susuga Papalii Monalisa Tia’i Keti, i le feiloaiga ma tusitala na faailoa ai sailiga i le fia maua o le alii o Silao Leleiga poo Silao Faaleleiga.
Ae o le nofoaga mo malologa ma tafaoga le Matagialalua friendship Park i tua maota o le Malo i le eleele fou, o lea foi ua aliali mai ai nisi o uiga le manuia o loo suesueina ai e leoleo ni alii talavou na latou faaleaga se taavale sa tu ai i le nofoaga o taavale, ao tafafao le aiga e ana le meatotino i lea nofoaga i le taulaga.
Se finagalo o le ofisa sinia o se tasi o sooupu mo le Pulega o Tagata Tafafao susuga Fanaea Natu, i le feiloaiga ma tusitala i le faaiuga o le vaiaso.
