I le ausia e le kamupani vaalele a le atunuu le Samoa Airways o ni tupe faasili poo polofiti e 11 miliona tālā, ma le miliona tālā na tuuina atu talu ai nei e avea ma ona sao i le faatupeina o galuega a le malo, o le tuua ai o le atunuu i le amataga o lenei vaiaso o fe’au ma galuega e le isi vaalele Twin Otter o le kamupani vaalele, auā galuega e toe faaleleia ai i le atunuu o Kanata, o se isi lea o laasaga tāua i le toe faatulaga lelei ai o auaunaga a le Samoa Airways mo le tautuaina o le atunuu faimalaga.
O le taeao o le Aso Gafua na malaga ese ai lea vaalele o le kamupani ma afea ai le motu o Christmas Island, ona faaauau ai lea i Kanata o le a faia ai galuega e toe faaleleia atoa ai afi faapea ma le tino.
O Fepuari o le tausaga nei na taunuu ai le vaalele Twin Otter o le Samoa Airways lea na muamua ave e faaleleia, ma ua faaauau nei lana tautua auā le tatou atunuu i femalagaa’i i le va o Samoa e lua, aemaise o malaga i le va o Tutuila faapea le motu o Manu’a.
E 10 miliona le tau o le galuega mo le vaalele muamua ma sa faatupe e le kamupani o le Samoa Airways, e faapena foi le faatupega o le faaleleia o le isi vaalele e pei ona tuua lo tatou atunuu.
Ua faailoa mai foi e le kamupani vaalele le ono faatino o se nonogatupe mai le auaunaga a le UTOS mo lea galuega pe afai e mana’omia.
