O aulakapi ta’ito’afitu a alii mai atunuu e pei o Amerika, Kanata, Kenya, Potukale, Siamani, Uruguay, Aialani, faapea ma Samoa, ua aga’i atu nei e sa’ili ni o latou avanoa i le vae mulimuli o le taamilosaga sa’ili avanoa e faia i Amerika i le faai’uga o le vaiaso nei.
O iinā o le a faamautū ai le agavaa e toe ulufale atu i le taamilosaga lakapi fitu autū a le lalolagi, lea sa tatou tausinio ai muamua.
O le aoauli o le Aso Gafua i Samoa na tuuvaa atu ai le aulakapi ta’ito’afitu a le Manu Samoa mo lea taamilosaga ma e lē o se tapenaga laitiiti sa feagai ma le faia’oga ulu ma le pulega, i le naunau e toe sao atu Samoa i le taamilosaga autū sa tatou fetaui ai ma ‘au malolosi a atunuu e pei o Niu Sila, Ausetalia ma Fiti tainane ‘au mai Europa ma Aferika i Saute.
Le ta’ita’i malaga o le tatou aulakapi ta’ito’afitu le susuga Su’a Hesed Ieremia.
O le Aso Faraile ma le Aso Toonai o le vaiaso nei le taamilosaga mulimuli sa’ili avanoa e faia i Los Angeles i Amerika lea o le a tausiniō ai ma Samoa.
