O le Aso Gafua o lenei vaiaso na momoli atu ai le tali tusitusia o le finagalo lea o le Fofoga Fetalai o le Palemene susuga Papalii Li’o Taeu Masepa’u e tali ai le manao o le taitai a le vaega faaupufai e Puipuia Aiā Tatau o tagata (HRPP) i le fia faatautō uma o i latou e le Ao o le Mālō pe a tauaofia le Palemene i le Aso Lua o le vaiaso fou.
Ua faailoa e le Fofoga Fetalai i lana tali o le manao a le susuga Tuilaepa Lupesoliai Sailele Malielegaoi ma sui filifilia o lana patī faaupufai ua tumau ai pea lo latou teena ma le lē talia o le faaiuga a le faamasinoga o talosaga apili ma fofogaina i le Aso 23 o Iulai ma aloaia ai le faatautoina o sui e to’a 26 o le FAST ma aloaia ai foi le faatautoina o ia o le Fofoga Fetalai faapea le Palemia ma Minisita uma o le Kapeneta o le faigamalo fou.
O le fautuaga a le Fofoga Fetalai ia Tuilaepa ma Lana vaega faaupufai o loo manino vaega o le tulafono faavae aemaise o tulafono a le Palemene sa latou fausia ma mulimulitaia lo latou taimi ao tu ai i le foe ma e lē faasala ese ai sona lagona aemaise le tamaitai Palemia i le usitaia o ia tulafono.
O le tusi a Tuilaepa i le Aso 1 o Setema Sa tuliloa ai se finagalo o le Fofoga Fetalai ma o loo ia taua ai e le’o māmā ia te ia ma lana vaega faaupufai le mataupu i le faatautoga ona e le’i auai le faatautoga na faia le Aso 24 o Me.
O loo faamamafa ai foi le finagalo o le taitai o le HRPP tū ma aga masani faale faavae i le faatautoina o sui na filifilia mai le palota tele o le auai o le Ao o le Mālō ma e uma e faatinoina lea galuega ua ia faailoa atu foi i le Fofoga Fetalai ua maea ona tāla’i i o latou aiga ma uo e auai atu i le usuia o le fono i le vaiaso fou i le finagalo maumaua’i o Tuilaepa o le tauaofiaga Lea e faatautō ai loa ma e mafai foi ona toe faatauto uma ai le Fofoga Fetalai ma tofiga o le Mālō fou i lona finagalo e leai se tulafono e taofia ai lea tulaga.
Peitai o le tali tusitusia a le Fofoga Fetalai ia Tuilaepa ua ia faailoa ai se finagalo o le tamaitai Palemia le afioga Fiame Naomi Mataafa ua tuuina atu i le taitai ma le vaega faaupufai a le HRPP ma e lē au ese ai le Fofoga Fetalai.
Faaalia e Papalii i se vaega o lana tali tusitusia e faitauina faapenei “Talofae i o tatou itumalo o e na filifilia i tatou o taitai o le atunuu ina ia tatou galulue faatasi ae peitai ua lē o lea, o lenei lava o loo outou teena ma lē taliaina le faatautoga o i matou aemaise ai le faaiuga mamalu a le faamasinoga e pei ona ua iai nei le faigamalo a le FAST, o lenā ua faailoa atu o le faaiuga a le faamasinoga o le tulafono e tusa ai o le vaega 11 (111) o le faavae o le Mālō tutoatasi o Samoa. O le faatautoina o outou afioga ua i le Fofoga Fetalai lea e tusa ai ma le vaega 111 (14)(1)(2) o tulafono tumau o le Palemene o Samoa 2021.”Attachments area
