E lua fale e faagaioi ai le atinae o le gaosia o le malosi faafouina e ola ai ogaumu kesi auā le gaseseina o taumafa ua taua i le gagana peretania o Home Biogas ua maua e Samoa i se fesoasoani mai le malo o Isaraelu.

O le uluai fale  gasoia ai lea kesi ua faatuina e le Matagaluega o Faatoaga ma Faigafaiva  ma faagaioiga e le vaega o laau totō ma o le atinae muamua ia o lea ituaiga tapenaga e maua ai le kesi ogaumu ua faagaioia e le Matagaluega talu ona oo atu i Samoa lea auala e maua ai lea malosiaga faafouina e ala i le faaaoga o otaota lafoai mai vaega o taumafa ua lē manaomia faapea otaota o manu.

Faailia e le Ofisa Sili o le Matagaluega o Faatoaga ma Faigafaiva Tilafono David Hunter o le foai a le malo o Isaraelu ua tauala atu i lana polokalame fesoasoani e taua o le “Israel Pacific Food Security Alliance” le talia ma le ioeina e taitai o Isaraelu ma fono ma taitai o malo o le Pasefika na usuia i le masina o Fepuari 2020.

O le fono foi lea na faamautu ai ma fesoasoani a lea malo i Sasae Tutotonu i le fausia o auala e faamautu ma faaleleia ai le maua pea o taumafa poo le food security, le soifua maloloina, pulea lelei o punaoa tau suavai, malosiaga faafouina ma galuega e fesootai ma suiga tetele o le tau.

O fale mo le gaosia o malosiaga faapaiokesi e le gata o le a maua ai le kesi mo ogaumu kesi ae o le a mafai ona gaosia ma maua ai ma faalelei eleele mo le ola lelei o laau tau faatoaga lea ua faaalia e le faauluuluga o vaega o laau totō a le Matagaluega o Faatoaga o se tasi foi o Pule Sili lagolago le susuga ia Tanu Toomata o loo matuā manaomia tele e le au fai faatoaga i Samoa