Ua lē tuuina atu ni tali a le toa sefululua o tama tane e aofia ai ni matai ma taulelea o le nuu o Lefagaoalii i o latou moliaga e fesootai ma le gaioiga na saisai ai aao o se matai matua o le nuu.
O le amataga o lenei vaiaso ina ua toe tauaofia galuega masani a le faamasinoga na tutulai ai i latou i le faamasinoga maualuga, peitai ua toe tolopo le tuuina atu o ni a latou tali i moliaga se’i maua se taimi o le latou loia e silasila ai i moliaga a leoleo.
O i latou e toa sefululua ua aofia ai Aitauaia Ioasa Lemau 70 tausaga o le soifua, Vaele Iosia Reupoamo poo Mikaele Reupoamo 75 tausaga o le soifua, Tauti Tiaka 68 tausaga o le soifua, Toemago Pa’u Lasalo 60 tausaga o le soifua, Lemana Nouata 55 tausaga o le soifua, Ofisa Sitafao 27 tausaga o le matua, Vaa Alai 41 tausaga o le matua, Amiga Lagaaia 31 tausaga le matua, Tomasi Samuelu 24 tausaga o le matua, Faavevela Lale 27 tausaga le matua, Lemana Pene poo Lemana Faleupolu Pene 57 tausaga o lona soifua ma Salapo Etene Uini ua 61 tausaga o lona soifua.
O moliaga o le faaoolima, ma le umia o se aupega matautia o loo molia ai i latou nei, seia vagana le tasi o matai matua o loo molia i le taumafai e faaoo le maliu, faaoolima tuga ma le umia o se aupega matautia o se tamai agaese.
