Ua folafola e Samoa, Palau ma Fiti lo latou tetee i le tulaga faaigoaina o le deep sea mining i le faaperetania ma ua valaau ai mo se gaioiga e faia i le tulaga lea ona o popolega o le a faaleagaina ai le foloa o le sami ma meaola e ola ane i ia siomaga.
Lipotia i le asō e le RNZ o le soofaatasi lea a atunuu e tolu ua folasia mai a o sauni le fonotaga a le United Nations Oceans Conference e faia i Portugal. O le valaau a atunuu e tolu e mo se moratorium poo se taofiga lē tumau i le faatinoina o ia ituaiga gaioiga e aveesea mai ai minerale mai le foloa o le sami, ma e to’atele foi isi faalapotopotoga tau le siosiomaga ma faigamalo o loo valaau pea ina ia faasāina ia ituaiga gaioiga.
E lei leva atu nei ona folafola e Vanuatu lo latou foi tetee i lea ituaiga fuafuaga, deep sea mining atoa ai foi ma isi atunuu e pei o Papua Niu Kini ma le Federated States of Micronesia. O le sui o le Pacific Liaison for Deep Sea Conservation Coalition Aotearoa o Phil McCabe na ia ta’ua o se moratorium o le a faatuai ai le faatinoina o ia ituaiga gaioiga, le deep sea mining.
Fai mai le sui o le Greenpeace Aotearoa, James Hita i lea lipoti o le tula’i mai a atunuu ia e tolu o se tulaga lelei tele ma ua tatau i le faigamalo a Niu Sila ona faamalosi mai lona tulaga i lea foi mataupu.
