Ua tusi le pulenuu fou o Aukilani i le Watercare, e taofi nei loa galuega uma mo le Three Waters.
O le fuafuaga lenei a le malo e lei lagolagoina e Wayne Brown, faapea ai foi le sa avea ma pulenuu o Aukilani Phil Goff atoa ai ma le tele o isi sui o pulega faaitumalo i totonu o le atunuu, ma o lea lava ua agai iai le pulenuu i le vaiaso lona lua talu ona tulai mai.
O le tusi a Brown ua tuuina atu lea i le faatonu o le pulega o le suavai, Margaret Devlin faapea ma le pule sili o le Auckland Council, Jim Stabback ma o loo ta’ua ai e le pulenuu e le o se fuafuaga e manao iai le Watercare, o le au fai sea poo shareholders atoa ai ma paaga.
Ua faatalosaga foi e le pulenuu, afai ua iai ni tupe a le Watercare poo le Auckland Council ua faaalu i lenei poloketi ma ana tapenaga, e tatau ona toe faafoi mai i tagata Aukilani e ala i tau maualalalo o le suavai.
E le o māmā i le pulenuu lana polomisi na faia i taimi o ana faatosina mo le palota, ma o le lagona foi lea o tagata Aukilani na faailoa ane a o taamilo ai i le silia ma le 300 polokalame na faia, e pei ona ta’ua e Brown.
O loo faaaoga e le pulenuu o Aukilani le avanoa a o lei pasia ai le uluai pili o loo fuafua a le Three Waters i le faaiuga o le tausaga, faamoemoe e amata aloaia ia Iulai o le 2024.
