Ua tusi atu le Taitaifono ma le Fono Faatonu o le Malosiaga Faaeletise poo le EPC i le Pule Faatonu le Regulator ina ia faatoese mai faalauaitele i luga o le nusipepa o le Samoa Observer, ma aveese lana tusi lea ua faalauaitele i faasalalauga i le atunuu.
Ua mafua le tusi atu o le Fono Faatonu ona o le tusi a le taitaifono na tuuina atu i le Minisita o Fesootaiga ia Toelupe Poumulinuku Onesemo i le aso 15 o Tesema 2022, o loo fautuaina ai le tatau ona faamalolo le Fono Faatonu ona ua latou le usitaia le Tulafono o Malosiaga tau Eletise 2010.
Na mafua lea mataupu ona o le laisene na sainia e le Taitaifono o le Fono Faatonu ma tuuina atu i se kamupani Farani latou te faatauina ai le Eletise i le atunuu e aunoa ma se talosaga na tuu atu i le Pule Faatonu poo se faatagaga foi a le Pule Faatonu e pei ona iai manaoga o loo i le Tulafono o Malosiaga Faaeletise 2010.
O le tusi a le Fono Faatonu o loo ta’ua ai tuuaiga le faavaea ua faia e le Pule Faatonu, ua ta’ua suafa o le Taitaifono ma le sui o le Fono Faatonu a le EPC ma ua avea ma tulaga ua osofai ai e le tele o tagata ina ua faasalalau faalauaitele e le media lea tusi.
E le gata i lea ae o loo faapea mai foi sa tatau ona tuuina atu se avanoa e aumai ai se tala a le Fono Faatonu e faamalamalama ai lea mataupu a o lei tuuina atu le tusi a le Pule Faatonu i le Minisita.
O le faatonuga la a le Fono Faatonu ua tuuina atu i le Regulator ua faatonuina ai ia le silia le Aso Faraile 03 o Mati ua tuuina atu se faatoesega faalauaitele ma o le a toe tagai foi iai le Fono Faatonu i itu uma o se faatoesega pe a faasalalauina.
O le taimi nei o loo malaga le tamaitai Pule Faatonu ma e le o mailoa pe faia se faatoesega pe leai.
