Tusa ma le 30,000 tausi soifua o le a maua siitaga o totogi amata mai i le tausaga fou, ma o le a faitau tutusa ai nei ma i latou o loo galulue i Ausetalia.

O le tausaga talu ai na malie ai le pulega a le soifua maloloina i totogi nei peitai na toe taofi ina ua oo i le tulafono lenei mataupu.

Ao iai pea i iloiloga o le aso ananafi ua faamatuu mai ai e le Employment Relations Authority le poloaiga le tumau e saili ai se fofo mo totogi o tausi soifua a o faagasolo pea.

O se tala fiafia e pei ona faailoa e le pule sili o le Te Whatu Ora Fepuleai Margie Apa, ma i lipoti o le toatele o tausi soifua o le a maua le siitaga e silia ma le 14%.

O le faaiuga ua sau nei e le o iai sona aafiaga i le itu o loo finauina ai e le Iuni i le tulafono.

O lona uiga mo le tausi soifua faatoa amata i falemai tetele o le a maua le totogi amata e $66,570 ua tutusa ai ma totogi i Ausetalia e tusa ma saunoaga a le minisita o le soifua maloloina Andrew Little.

A o tausi soifua e maualuluga agavaa ma tomai e tusa ma le $95,340.

O le aso 7 o Mati o le 2023 e aloaia ai totogi fou ua faailoa mai.