A itiiti mai pe to’a 20 tagata ua maliliu ina ua sa’e se vaa na malaga ane ai i gataifale o Tunisia.

Fai mai o le lua ai lea o faalavelave faapea i totonu o le vaiaso.

Ua ta’ua e le CNN o le vaa na faaletonu i le tusa ma le 13 maila i gaitafale o Sfax, o se tasi o aai tele i le itu i Sasae o le atunuu ma o se tasi o nofoaga e faaautū iai tagata e taunuu atu i Europa aemaise lava tagata mai le toafa o le Sahara i Aferika.

Fai mai e to’alima na faasaoina mai lea vaa ae o le isi foi faalavelave na tupu i le Aso Tofi talu ai ina ua sa’e se isi vaa na malaga ane ai tagata ma maliliu ai a itiiti mai tagata e to’aiva.

O Tunisia lea ua avea ma se tasi o nofoaga autū e faimalaga ese mai ai tagata mai Aferika ma Sasae Tutotonu mo faamoemoe o ni soifua manuia i le Atu Europa.

Puna o Faamatalaga: https://edition.cnn.com/2024/12/18/world/migrants-die-boat-sinks-tunisia-intl-latam/index.html